NDPS એક્ટ હેઠળ ઉત્કૃષ્ટ કામગીરી કરનાર ૫૨ પોલીસ અધિકારી-કર્મચારીઓને મળશે ‘આઉટ ઓફ ટર્ન’ બઢતી
ગાંધીનગર,
રાજ્યમાં નશીલા પદાર્થોની હેરાફેરી અને ડ્રગ્સ માફિયાઓ સામે લાલ આંખ કરનાર પોલીસ અધિકારીઓ અને કર્મચારીઓ માટે એક મહત્વના સમાચાર સામે આવ્યા છે. ગુજરાત પોલીસ વિભાગ દ્વારા એનડીપીએસ (NDPS) એક્ટ હેઠળ ઉત્કૃષ્ટ અને પ્રશંસનીય કામગીરી કરનારા કુલ ૫૨ પોલીસ અધિકારીઓ અને કર્મચારીઓને ‘આઉટ ઓફ ટર્ન’ (સમય પહેલા/ક્રમ બહાર) બઢતી આપવાની પ્રક્રિયા હાથ ધરવામાં આવી છે. પોલીસ મહાનિરીક્ષક (વહીવટ) ગગનદીપ ગંભીર દ્વારા આ અંગેનો એક સત્તાવાર પત્ર જાહેર કરીને વિગતો મંગાવવામાં આવી છે.
ATS અને વિવિધ જિલ્લાના ૫૨ પોલીસકર્મીઓ રેસમાં
ગુજરાત પોલીસ ભવન, ગાંધીનગરથી જાહેર કરાયેલી યાદી મુજબ, આ યાદીમાં એન્ટી ટેરરિસ્ટ સ્ક્વોડ (ATS) અમદાવાદ, સી.આઈ.ડી. ક્રાઈમ, એસીબી તેમજ મહિસાગર, અરવલ્લી, દાહોદ, સાબરકાંઠા, બનાસકાંઠા, ગીર સોમનાથ, વડોદરા ગ્રામ્ય, રાજકોટ અને સુરત જેવા વિવિધ જિલ્લાઓમાં ફરજ બજાવતા અધિકારીઓનો સમાવેશ થાય છે. જેમાં પોલીસ ઈન્સ્પેક્ટર (PI), પોલીસ સબ ઈન્સ્પેક્ટર (PSI), આસિસ્ટન્ટ સબ ઈન્સ્પેક્ટર (ASI), હેડ કોન્સ્ટેબલ અને પોલીસ કોન્સ્ટેબલ કક્ષાના કર્મીઓ સામેલ છે.બઢતીની રેસમાં સામેલ મુખ્ય અધિકારીઓમાં ATS અમદાવાદના પી.આઈ. જે.એન.ચાવડા, જે.એમ.પટેલ, બી.એચ.કોરોટ, વી.એન.વાઘેલા, વાય.જી.ગુર્જર તેમજ સી.આઈ.ડી. ક્રાઈમના પી.આઈ. પી.બી.ઝાલા સહિતના જાંબાઝ અધિકારીઓનો સમાવેશ થાય છે.
ખાતાકીય તપાસ અંગે વિગતો મંગાવાઈ
પોલીસ વડાની કચેરી દ્વારા તમામ સંબંધિત પોલીસ કમિશ્નરશ્રીઓ, એ.ડી.જી.પી. (ATS) અને જિલ્લા પોલીસ વડાઓને આદેશ આપવામાં આવ્યો છે કે, યાદીમાં દર્શાવેલા ૫૨ અધિકારીઓ/કર્મચારીઓ સામે હાલમાં કોઈ ખાતાકીય તપાસ, કોર્ટ કેસ, વિજીલન્સ તપાસ કે શિક્ષાની અમલવારી ચાલુ અથવા બાકી છે કે કેમ, તેની વિગતો આધાર-પુરાવા સાથે તાત્કાલિક મોકલી આપવામાં આવે.ડ્રગ્સના દૂષણને ડામવા માટે રાત-દિવસ જોયા વગર કામ કરનારા પોલીસ જવાનોને આ આઉટ ઓફ ટર્ન પ્રમોશન મળવાથી પોલીસ બેડામાં ઉત્સાહનો માહોલ જોવા મળી રહ્યો છે અને તેનાથી અન્ય કર્મચારીઓ પણ વધુ સારી કામગીરી કરવા માટે પ્રોત્સાહિત થશે.
