ભાટ ગામના ભાજપ અગ્રણીઓ દ્વારા ગાંધીનગર મનપાના નવનિયુક્ત પદાધિકારીઓને શુભકામના પાઠવી
વોર્ડ નંબર 11ના કાઉન્સિલર અને પૂર્વ સ્ટેન્ડિંગ કમિટીના ચેરમેન શ્રી જશવંતભાઈ પટેલ દ્વારા ગાંધીનગર મનપાના નવા પદાધિકારીઓને યશસ્વી કારકિર્દીની શુભેચ્છાઓ પાઠવી
ગાંધીનગર,
ગાંધીનગર મહાનગરપાલિકાના શાસનની ધુરા સંભાળનારા નવા પદાધિકારીઓની નિમણૂક બાદ પદભાર ગ્રહણ સમારોહમાં તેમનું ઉષ્માભેર સ્વાગત કરવામાં આવી રહ્યું છે. જેના ભાગરૂપે ગાંધીનગર નજીક આવેલા ભાટ ગામના ભારતીય જનતા પાર્ટી (ભાટ સંગઠન) દ્વારા ગાંધીનગર મહાનગરપાલિકાના નવનિયુક્ત પદાધિકારીઓને સામૂહિક સન્માન તેમજ શુભકામના પાઠવવામાં આવી હતી.
આ વિશેષ કાર્યક્રમમાં ગાંધીનગરના પ્રથમ નાગરિક એટલે કે મેયર શ્રી રૂપસિંહ ઠાકોર, ડેપ્યુટી મેયર શ્રીમતી અંજનાબેન મહેતા, સ્ટેન્ડિંગ કમિટીના ચેરમેન શ્રી મહેન્દ્ર પટેલ (દાસ), ભારતીય જનતા પાર્ટીના શાસક પક્ષના નેતા શ્રી જશપાલસિંહ બિહોલા તેમજ દંડક શ્રીમતી સેજલબેન પરમારનું વિશેષ અભિવાદન કરવામાં આવ્યું હતું. ભાટ ગામના ગ્રામજનો અને ભાજપ પરિવાર દ્વારા આ તમામ પદાધિકારીઓને શુભેચ્છાઓ આપીને સન્માનિત કરવામાં આવ્યા હતા.
આ પ્રસંગે ભાટ ગામના વતની અને ગાંધીનગર મહાનગરપાલિકાના વોર્ડ નંબર ૧૧ ના કાઉન્સિલર તેમજ પૂર્વ સ્ટેન્ડિંગ કમિટીના ચેરમેન શ્રી જશવંતભાઈ પટેલ દ્વારા તમામ નવા પદાધિકારીઓને આવકારીને તેમની નવી જવાબદારીઓ, યશસ્વી રાજકીય કારકિર્દી અને ઉજ્જવળ ભવિષ્ય માટે હાર્દિક શુભકામનાઓ પાઠવી હતી. તેમણે વિશ્વાસ વ્યક્ત કર્યો હતો કે આ નવી ટીમ ગાંધીનગર શહેર અને મહાનગરપાલિકા વિસ્તારમાં વિકાસના નવા આયામો સર કરશે.
આ પદભાર ગ્રહણ સમારોહમાં ભાટ ગામના ભારતીય જનતા પાર્ટીના તમામ સમાજના આગેવાનો, વિવિધ જ્ઞાતિના શ્રેષ્ઠીઓ, વડીલો અને કાર્યકર્તાઓ ઉપસ્થિત રહ્યા હતા. ઉપસ્થિત તમામ અગ્રણીઓએ પદાધિકારીઓને આવકારીને બિરદાવ્યા હતા અને જનપ્રતિનિધિ તરીકેની તેમની નવી સફર માટે શુભેચ્છાઓ આપી હતી. સમગ્ર કાર્યક્રમ દરમિયાન ઉત્સાહ અને આત્મીયતાનો માહોલ જોવા મળ્યો હતો.
