સુરત મનપાની મેગા ફૂડ સેફ્ટી ડ્રાઈવમાં ૨૮૦ એકમોનું ચેકિંગ
સુરત,
સુરત મહાનગરપાલિકાના આરોગ્ય વિભાગ દ્વારા શહેરમાં હોટેલ-રેસ્ટોરન્ટ તથા ઢાબાઓમાં સ્વચ્છતા અને ખાદ્ય સુરક્ષાના નિયમોના પાલન માટે છેલ્લા ત્રણ દિવસથી સઘન ફૂડ સેફ્ટી ડ્રાઈવ હાથ ધરવામાં આવી હતી. આરોગ્ય અધિકારીની સૂચનાથી ફૂડ સેફ્ટી અધિકારીઓ અને ઝોનના સેનિટેશન સ્ટાફની સંયુક્ત ટીમોએ શહેરના વિવિધ વિસ્તારોમાં તપાસ હાથ ધરી હતી.
આ મેગા ડ્રાઈવ દરમિયાન કુલ ૨૦૯ હોટેલ-રેસ્ટોરન્ટ અને ૭૧ ઢાબા સહિત ૨૮૦ એકમોનું ચેકિંગ કરવામાં આવ્યું હતું. તપાસ દરમિયાન કિચનની સ્વચ્છતા, વાસી અથવા એક્સપાયરી ડેટવાળા ખાદ્યપદાર્થોનો સંગ્રહ, ફૂડ હેન્ડલર્સનું મેડિકલ ફિટનેસ સર્ટિફિકેટ, પેસ્ટ કંટ્રોલ સર્ટિફિકેટ, પાણીની શુદ્ધતા, કચરાના નિકાલ, ડસ્ટબીન, ડીપ ફ્રિજ અને અનાજના સ્ટોરેજ સહિતની બાબતોની ચકાસણી કરવામાં આવી હતી.
તપાસ દરમિયાન વિવિધ એકમોમાંથી કુલ ૧૪૧૩.૮ કિલો અસાત્વિક અને અખાદ્ય ખોરાકનો નાશ કરવામાં આવ્યો હતો. ખાદ્યપદાર્થોની ગુણવત્તા ચકાસવા માટે ૧૩ ફોર્મલ અને ૨૯ ઇન-ફોર્મલ નમૂના લેવામાં આવ્યા હતા, જે લેબોરેટરી પૃથક્કરણ માટે પબ્લિક હેલ્થ લેબોરેટરીમાં મોકલવામાં આવ્યા છે.
નિયમભંગ અને ગંદકી સામે પણ મનપાએ કડક કાર્યવાહી કરી હતી. કુલ ૧૫૪ સંસ્થાઓને નોટિસ આપવામાં આવી હતી, જ્યારે ગંભીર ક્ષતિઓ જોવા મળતાં ૧૪ હોટેલ-રેસ્ટોરન્ટ અને અન્ય એકમોને તાત્કાલિક સીલ કરવામાં આવ્યા હતા. આ ઉપરાંત નિયમભંગ બદલ કુલ રૂ. ૪.૬૯ લાખથી વધુનો વહીવટી દંડ વસૂલવામાં આવ્યો હતો.
ઝોનવાર કામગીરીમાં સાઉથ ઝોન-એમાં સૌથી વધુ ૭૮૭ કિલો અખાદ્ય જથ્થાનો નાશ કરવામાં આવ્યો હતો. નોર્થ ઝોનમાં ગંભીર ક્ષતિ બદલ ૮ એકમો બંધ કરાવવામાં આવ્યા હતા. જ્યારે સેન્ટ્રલ, ઇસ્ટ, વેસ્ટ, સાઉથ અને સાઉથ-વેસ્ટ સહિતના વિવિધ ઝોનમાં પણ મોટા પ્રમાણમાં અખાદ્ય ખોરાકનો નાશ કરી નોટિસ અને દંડની કાર્યવાહી કરવામાં આવી હતી.
મનપા આરોગ્ય વિભાગે હોટેલ-રેસ્ટોરન્ટ સંચાલકોને ખાદ્ય સુરક્ષા અને સ્વચ્છતાના નિયમોનું કડક પાલન કરવા તાકીદ કરી છે. નાગરિકોને પણ બહાર જમતી વખતે હોટેલ-રેસ્ટોરન્ટની સ્વચ્છતા અને ખાદ્યપદાર્થોની ગુણવત્તા અંગે સાવચેતી રાખવા અપીલ કરવામાં આવી છે. શંકાસ્પદ રંગ, વાસ અથવા ચીકાશ ધરાવતા ખાદ્યપદાર્થોનું સેવન ટાળવા તેમજ કોઈપણ સ્થળે અસ્વચ્છતા કે નિયમભંગ જોવા મળે તો મનપાના ફૂડ વિભાગને જાણ કરવા અપીલ કરાઈ છે.
