સાહેબ મીટિંગમાં છે” એવો જવાબ આપવા માટે સચિવાલયમાં વધુ ૨૮ અધિકારીઓની નિમણૂક!
26 વિભાગો, 19 કચેરીઓ અને માત્ર 28 નવા અધિકારી… દરેક વિભાગના ભાગે માંડ ‘અડધો’ સાહેબ! વિકાસ તો દોડશે હવે!
સચિવાલયમાં નવી ભરતી: હવે ફાઇલો પર ધૂળ ખાવાની સ્પીડ વધશે!
ગુજરાત સરકારે વહીવટી કામગીરીને “અતિશય ઝડપી” બનાવવા માટે એક ઐતિહાસિક નિર્ણય લીધો છે. સચિવાલયમાં સેક્શન ઓફિસરની સંખ્યા ૬૦૬ થી વધારીને ૬૩૪ કરવામાં આવી છે. હા, તમે સાચું વાંચ્યું! માત્ર ૨૮ નવા સાહેબોના ઉમેરાથી હવે આખું તંત્ર રોકેટ ગતિએ દોડવા લાગશે!
આ નિર્ણયના કેટલાક “ફાયદા” નીચે મુજબ છે:
અદ્ભુત ગણિત:
૨૬ વિભાગો અને ૧૯ કચેરીઓ (કુલ ૪૫ જગ્યાઓ) વચ્ચે ૨૮ અધિકારીઓ વહેંચાશે! એટલે કે એક વિભાગના ભાગે માંડ પોણો (0.75) અધિકારી આવશે. હવે આ ‘પોણા સાહેબ’ ફાઈલ પર કેટલી ઝડપથી સહી કરશે તે જોવું રસપ્રદ રહેશે!
ફાઇલોની નવી સફર:
પહેલાં તમારી ફાઇલ ૫ ટેબલ પર ફરતી હતી અને દરેક ટેબલ પર “કાલે આવજો” સાંભળવું પડતું હતું. હવે નવા પદો ઉમેરાતા તમારી ફાઇલ ૬ ટેબલ પર જશે! એટલે કે ફાઈલોને સચિવાલય દર્શન કરવાનો વધુ એક રૂટ મળશે.
ચા ના કપમાં વધારો:
અધિકારીઓ વધશે એટલે સચિવાલયની કેન્ટીન વાળાનો વકરો વધશે. રોજ ૨૮ કપ ચા અને સમોસાનું વેચાણ વધવાથી રાજ્યના જીડીપી (GDP) માં સીધો ઉછાળો આવશે.
“સાહેબો” વધ્યા, કામ કોણ કરશે?:
૮૬ નાયબ સેક્શન અધિકારીઓને બઢતી આપીને સાહેબ (વર્ગ-૨) બનાવી દેવાયા. હવે ઓર્ડર આપવા વાળા વધી ગયા છે, પણ ટાઇપિંગ કરવા વાળા ક્લાર્કની ખુરશીઓ ખાલી છે. કદાચ હવે ફાઈલો પોતાની જાતે જ ચાલીને આગળ વધતી થઈ જશે!
સામાન્ય નાગરિક માટે સારાંશ:
અત્યાર સુધી સરકારી કચેરીમાં કામ પતાવવા માટે તમારે 10 ધક્કા ખાવા પડતા હતા. સરકારના આ ક્રાંતિકારી નિર્ણય બાદ, હવે તમારે પૂરેપૂરા… 10 જ ધક્કા ખાવા પડશે, પણ હવે 28 નવા ચહેરા તમને કહેશે કે
“આજે સાહેબ રજા પર છે, આવતા અઠવાડિયે આવજો!”
(નોંધ: આ માત્ર હળવાશથી લેવા માટે છે, બાકી સરકારી કામ તો તેના ‘નિયત સમયે’ જ થશે!)* 😜 બહુ ખુશ થવાની જરૂર નથી!
