ડૂબી ગયેલામાંથી ૮ દિવસ બાદ ૯ માછીમારોના મૃતદેહ મળ્યા

મૃતદેહો ખરાબ રીતે સડી જવાથી ઓળખ માટે DNA ટેસ્ટ કરાશે; અન્ય ૬ માછીમારો હજુ પણ લાપતા; પીએમ મોદી દ્વારા ૨ લાખ રૂપિયાની સહાયની જાહેરાત

કોલકાતા: પશ્ચિમ બંગાળના દક્ષિણ ૨૪ પરગણા નજીક બંગાળની ખાડીમાં એક મોટી દુર્ઘટના સામે આવી છે. ૮ દિવસ પહેલા દરિયામાં ડૂબી ગયેલા ‘જય મા કાલી’ નામના ટ્રોલરમાંથી નવ માછીમારોના મૃતદેહ મળી આવ્યા છે, જ્યારે અન્ય છ માછીમારો હજુ પણ ગુમ હોવાથી તેમની સઘન શોધખોળ ચાલી રહી છે.

શું હતી સમગ્ર ઘટના? પ્રાપ્ત માહિતી અનુસાર, ‘જય મા કાલી’ નામનું આ ટ્રોલર ગત ૨ જુલાઈના રોજ પૂર્વ મેદિનીપુર જિલ્લાના શંકરપુર ફિશિંગ હાર્બરથી ૧૫ માછીમારોને લઈને દરિયામાં માછલી પકડવા રવાના થયું હતું. જોકે, ૬ જુલાઈ પછી આ ટ્રોલરનો સંપર્ક કંટ્રોલ રૂમ સાથે તૂટી ગયો હતો. પ્રાથમિક તપાસ મુજબ દરિયામાં ખરાબ હવામાનને કારણે આ ટ્રોલર પલટી ખાઈ ગયું હોવાનું માનવામાં આવે છે. ઘટનાનું ચોક્કસ કારણ તપાસના અંતે જ જાણી શકાશે.

રાહત અને બચાવ કામગીરી જિલ્લા પ્રશાસનના જણાવ્યા મુજબ, પોલીસ અને ભારતીય તટરક્ષક દળ (Coast Guard) દ્વારા સતત આઠ દિવસ સુધી ચલાવવામાં આવેલા સર્ચ ઓપરેશન બાદ શનિવારે બક્ખાલી તટથી લગભગ ૩૫ કિલોમીટર દૂર બાઘેર ચાર પાસે ડૂબેલાં ટ્રોલરનો પત્તો લાગ્યો હતો. રવિવારે અન્ય માછીમારી ટ્રોલરોની મદદથી તેને પાથરપ્રતિમાના સીતારામપુર તટ સુધી ખેંચી લાવવામાં આવ્યું હતું. ત્યારબાદ આખી રાત ચાલેલા રાહત અભિયાન દરમિયાન ટ્રોલરની અંદરથી નવ માછીમારોના મૃતદેહ બહાર કાઢવામાં આવ્યા હતા.

ઓળખ માટે DNA ટેસ્ટની જરૂરિયાત સંબંધિત અધિકારીએ જણાવ્યું હતું કે, દરિયાના પાણીમાં ઘણા દિવસો સુધી રહેવાને કારણે તમામ મૃતદેહો ખરાબ રીતે કોહવાઈ ગયા છે, જેના કારણે તેમની પ્રાથમિક ઓળખ કરવી અત્યંત મુશ્કેલ બની ગઈ છે. આથી હવે મૃતકોની ઓળખ સુનિશ્ચિત કરવા માટે ડીએનએ (DNA) ટેસ્ટ કરવામાં આવશે.

ગુમ થયેલાઓમાં ઓડિશાના ૩ સગા ભાઈઓ પણ સામેલ આ દુર્ઘટનામાં ગુમ થયેલા માછીમારોમાં ઓડિશાના બાલાસોર જિલ્લાના ત્રણ સગા ભાઈઓનો પણ સમાવેશ થાય છે:

• રવીન્દ્ર માઝી (ઉં.વ. ૫૨)
• જયરામ માઝી (ઉં.વ. ૪૯)
• જગન્નાથ માઝી (ઉં.વ. ૪૫)

તેમના સંબંધી સન્યાસી માઝીએ જણાવ્યું કે ત્રણેય ભાઈઓ અગાઉ પણ ઘણી વખત માછલી પકડવા માટે શંકરપુર જતા હતા. ઉલ્લેખનીય છે કે, શરૂઆતમાં ૧૬ લોકો આ ટ્રોલરમાં જવાના હતા, પરંતુ એક વ્યક્તિ કોઈ કારણસર ગયો ન હતો. બાકીના મૃતક અને ગુમ થયેલા માછીમારો પૂર્વ મેદિનીપુર, હાવડા અને નદિયા જિલ્લાના રહેવાસી છે.

પરિવારજનોની આંખોમાં આસું હાલ કાકદ્વીપ ઉપ-વિભાગીય હોસ્પિટલની મોર્ચરી (શબઘર) ની બહાર માછીમારોના પરિવારજનો ભારે હૈયે રાહ જોઈ રહ્યા છે. આ ઘટનાથી સમગ્ર વિસ્તારમાં શોકનું મોજું ફરી વળ્યું છે.

પીએમ મોદીએ વ્યક્ત કર્યો શોક વડાપ્રધાન નરેન્દ્ર મોદીએ આ માછીમારોના નિધન પર ઊંડા દુઃખની લાગણી વ્યક્ત કરી છે અને પ્રધાનમંત્રી રાષ્ટ્રીય રાહત ભંડોળ (PMNRF) માંથી મૃતકોના પરિવારજનોને રૂપિયા ૨-૨ લાખની આર્થિક સહાય આપવાની સત્તાવાર જાહેરાત કરી છે.