મોર્કલ અને ટેન ડોશેટની થઈ શકે છે હકાલપટ્ટી!
ઇંગ્લેન્ડ અને આયર્લેન્ડ સામે શરમજનક પરાજય બાદ BCCI એક્શન મોડમાં; ફિલ્ડિંગ કોચ ટી. દિલીપ પર પણ લટકતી તલવાર
નવી દિલ્હી
ઇંગ્લેન્ડ અને આયર્લેન્ડ સામે ટી-20 સિરીઝમાં વેઠવો પડેલો શરમજનક પરાજય હવે ભારતીય ક્રિકેટ ટીમના સપોર્ટ સ્ટાફ માટે ભારે પડવાનો છે. સૂત્રોના જણાવ્યા અનુસાર, મુખ્ય કોચ ગૌતમ ગંભીરના અત્યંત વિશ્વાસુ ગણાતા આસિસ્ટન્ટ કોચ રાયન ટેન ડોશેટ અને બોલિંગ કોચ મોર્ને મોર્કલની ટીમમાંથી એક્ઝિટ લગભગ નક્કી મનાઈ રહી છે. ઇંગ્લેન્ડ સામેની આગામી વનડે સિરીઝ પૂરી થતાં જ આ બંને દિગ્ગજોનો કરાર સમાપ્ત થઈ રહ્યો છે, જેને આગળ લંબાવવામાં આવે તેવી શક્યતા નહિવત્ છે.
10થી વધુ કેચ છૂટ્યા: ફિલ્ડિંગ કોચ પણ રડારમાં
સિરીઝ દરમિયાન ટીમ ઇન્ડિયાનું પ્રદર્શન માત્ર બેટિંગ કે બોલિંગમાં જ નહીં, પરંતુ ફિલ્ડિંગમાં પણ અત્યંત કથળેલું જોવા મળ્યું હતું. આયર્લેન્ડ અને ઇંગ્લેન્ડના પ્રવાસ દરમિયાન ભારતીય ખેલાડીઓએ 10થી વધુ સરળ કેચ છોડ્યા હતા. ફિલ્ડિંગના આ કથળેલા સ્તરને પગલે BCCI ફિલ્ડિંગ કોચ ટી. દિલીપની કામગીરીથી પણ ભારે નારાજ છે અને તેમને પણ પદ પરથી હટાવવામાં આવી શકે છે.
સતત પ્રવાસથી ટેન ડોશેટ નારાજ, મોર્કલ શોધશે નવો વિકલ્પ
રિપોર્ટ્સ મુજબ, રાયન ટેન ડોશેટ આખું વર્ષ ભારતીય ટીમ સાથે સતત પ્રવાસ કરવાના શિડ્યુલથી સંતુષ્ટ નથી અને તેમણે આ અંગે બોર્ડ સમક્ષ નારાજગી પણ વ્યક્ત કરી છે. તેઓ આગામી સમયમાં કોઈ IPL ફ્રેન્ચાઈઝી સાથે જોડાઈ શકે છે. બીજી તરફ, મોર્ને મોર્કલ પણ પોતાના ભવિષ્ય માટે અન્ય વિકલ્પો પર વિચાર કરી રહ્યા છે.
પ્રવાસ માટે સંભવિત બદલાવ: બાલાજી અને લક્ષ્મણને મળી શકે છે કમાન
જો મોર્કલ અને ટેન ડોશેટ બહાર થાય છે, તો આગામી પ્રવાસો માટે BCCI એ વૈકલ્પિક પ્લાન તૈયાર કરી લીધો છે:
- શ્રીલંકા પ્રવાસ (ઓગસ્ટ): ભારત ઓગસ્ટની શરૂઆતમાં શ્રીલંકા સામે બે ટેસ્ટ મેચની સિરીઝ રમવાનું છે. આ પ્રવાસમાં સેન્ટર ઓફ એક્સેલન્સ (CoE)ના નવા ફાસ્ટ બોલિંગ કોચ લક્ષ્મીપતિ બાલાજીને ટીમ સાથે મોકલવામાં આવી શકે છે.
- ઝિમ્બાબ્વે પ્રવાસ (જુલાઈ અંત): જુલાઈના અંતમાં યોજાનારી ટી-20 સિરીઝ માટે વીવીએસ લક્ષ્મણ CoEના કોચિંગ સ્ટાફ સાથે ટીમ ઇન્ડિયાના હેડ કોચ તરીકેની જવાબદારી સંભાળશે.
ગંભીરનો રિપોર્ટ કાર્ડ: મર્યાદિત ઓવરોમાં ‘હિટ’, ટેસ્ટમાં ‘ફ્લોપ’
જુલાઈ 2024માં ગૌતમ ગંભીરે ભારતીય ટીમના મુખ્ય કોચ તરીકે પદ સંભાળ્યું હતું. તેમના કાર્યકાળ દરમિયાન ટીમનું પ્રદર્શન મિશ્ર રહ્યું છે:
| ફોર્મેટ | મેચ રમાઈ | જીત | મેળવેલી સિદ્ધિઓ / પ્રદર્શન |
| વનડે (ODI) | 23 | 16 | ચેમ્પિયન્સ ટ્રોફી 2025નું ટાઇટલ જીત્યું. |
| ટી-20 (T20I) | 53 | 37 | એશિયા કપ 2025 અને T-20 વર્લ્ડ કપ 2026 જીત્યા. |
| ટેસ્ટ (Test) | 18 | 06 | ન્યુઝીલેન્ડ-સાઉથ આફ્રિકા સામે ઘરઆંગણે હાર, 10 વર્ષે બોર્ડર-ગાવસ્કર ટ્રોફી ગુમાવી. |
ઐતિહાસિક પરાજયના બે ડાઘ:
- ઇંગ્લેન્ડ સામે 12 વર્ષ પછી હાર: વર્ષ 2014 પછી પહેલીવાર ઇંગ્લેન્ડે ભારતને ટી-20 સિરીઝમાં હરાવ્યું છે.
- આયર્લેન્ડ સામે શરમજનક રેકોર્ડ: ક્રિકેટ ઇતિહાસમાં ભારત પહેલીવાર આયર્લેન્ડ સામે (2-0થી) ટી-20 સિરીઝ હર્યું છે. આ પહેલાં વર્ષ 2023માં વેસ્ટ ઇન્ડીઝ સામે ભારત સિરીઝ હાર્યું હતું.
