ગાંધીનગરમાં બિલ્ડરો ગેલમાં ! ૪-૪ TP સ્કીમોની ફેર દરખાસ્તો મંજૂર

જનતાના પ્રશ્નો પર ‘મૌન’, બિલ્ડરોના કામો પર ‘મહોર’ ???

મેયરના અધ્યક્ષસ્થાને મળેલી બેઠકમાં કુડાસણ, રાંદેસણ, કોબા અને અમીયાપુર સહિતની TP સ્કીમોની ફેર દરખાસ્તો બહાલ : RMC પ્લાન્ટ માટેની નવી SOP મંજૂર

ગાંધીનગર,
ગાંધીનગર મહાનગરપાલિકાની સામાન્ય સભાની એક મહત્વપૂર્ણ બેઠક શનિવારે સાંજે ૦૪:૩૦ કલાકે સેકટર-૧૭ સ્થિત પંડિત દિનદયાળ ઉપાધ્યાય ભવનના ચોથા માળે આવેલા સભાખંડમાં માનનીય મેયરશ્રીના અધ્યક્ષસ્થાને યોજાઈ હતી. આ બેઠકમાં કમિશનરશ્રી તરફથી રજૂ કરાયેલી વિવિધ જનહિતલક્ષી ભલામણો અને દરખાસ્તો પર વિગતવાર ચર્ચા-વિચારણા કર્યા બાદ, શહેરના વિકાસને વેગ આપતા કુલ 7 જેટલા મહત્વના વિષયોને સર્વાનુમતે મંજૂરી આપવામાં આવી હતી. સભાની શરૂઆતમાં ગત સામાન્ય સભાના પ્રોસીડીંગ્સને બહાલી આપીને વહીવટી કામગીરી આગળ ધપાવવામાં આવી હતી.

• ગાંધીનગર મહાનગરપાલિકાની સામાન્ય સભા માત્ર એક ઔપચારિકતા સાબિત થઈ છે. વિકાસના નામે લેવાયેલા નિર્ણયોમાં સામાન્ય જનતાની હાલાકી દૂર કરવાને બદલે શાસકો, દ્વારા કોને સીધો ફાયદો કરાવવામાં આવ્યો…

• શહેરમાં બિસ્માર રસ્તા, પાણીની અછત અને સફાઈના પ્રશ્નો જૈસે થે વૈસે જ છે, ત્યારે કોના ઈશારે અને કોને રાજી કરવા માટે કરાયા આવા નિર્ણયો. સભામાં પ્રજાના પાયાના પ્રશ્નોને હાંસિયામાં ધકેલીને માત્ર કોને ફાયદો કરાવા ઠરાવોને મંજૂરી આપવામાં આવી ગાંધીનગરની જનતા સૌ જાણી અને સમજી રહી છે.

TP સ્કીમોની ફેર દરખાસ્તોને લીલીઝંડી

શહેરના સંતુલિત વિકાસ અને આધુનિક ઇન્ફ્રાસ્ટ્રક્ચર પ્રોજેક્ટ્સને ઝડપી બનાવવા માટે સામાન્ય સભામાં ટાઉન પ્લાનિંગ ક્ષેત્રે કેટલાય મોટા નિર્ણયો લેવાયા હતા, જેમાં મુખ્યત્વે:

• TP નં. ૦૫ (કુડાસણ-રાંદેસણ-ધોળાકુવા-ઇન્દ્રોડા): નગર રચના અધિકારીશ્રીની તા. ૩૧/૦૫/૨૦૨૬ની પ્રારંભિક યોજનાના નિર્ણયો જાહેર કરતાં પહેલાની ફેર દરખાસ્તને ટાઉન પ્લાનિંગ અને એસ્ટેટ સમિતિની મંજૂરી બાદ સામાન્ય સભાએ પણ બહાલી આપી છે.
• TP નં. ૦૩ (કુડાસણ-કોબા): આ યોજના અંતર્ગત તા. ૧૪/૦૮/૨૦૨૫ ના રોજ પ્રારંભિક નિર્ણયો જાહેર કરતાં પહેલાની ફેર દરખાસ્ત અંગે કમિશનરશ્રીની ભલામણને મંજૂરીની મહોર મારવામાં આવી છે.
• TP નં. ૨૨ (કુડાસણ-રાંદેસણ) અને TP નં. ૪૧૦ (અમીયાપુર-ઝુંડાલ-સુઘડ) : અનુક્રમે તા. ૧૩/૦૩/૨૦૨૬ અને તા. ૧૦/૧૨/૨૦૨૫ વાળી ફેર દરખાસ્તોને પણ ટાઉન પ્લાનિંગ સમિતિના ઠરાવો અન્વયે સ્વીકારી લેવામાં આવી છે.

RMC પ્લાન્ટ માટે નવી SOP અને રમતગમત ખર્ચને બહાલી

આંતરમાળખાકીય વિકાસની સાથે નીતિ વિષયક ક્ષેત્રે પણ કોર્પોરેશન દ્વારા બે મહત્વના નિર્ણયો લેવાયા છે:

૧. બાંધકામ ગુણવત્તા માટે નવી SOP:
શહેરમાં થતા બાંધકામોની ગુણવત્તા સુધરે અને આધુનિકીકરણ થાય તે હેતુથી રેડી-મિક્સ ક્રોંક્રિટ (RMC) પ્લાન્ટ માટેના ક્રોંક્રિટ બેચિંગ પ્લાન્ટના સ્થાપન (Erection) તથા વપરાશ માટે જરૂરી લાયસન્સ આપવાની ‘સ્ટાન્ડર્ડ ઓપરેટિંગ પ્રોસિજર’ (SOP) ને સભા દ્વારા મંજૂરી આપવામાં આવી છે.

૨. ક્રિકેટ ટુર્નામેન્ટના ખર્ચની ચૂકવણી:
આઈ.આઈ.ટી, પાલજ ખાતે યોજાયેલ ‘ઓલ ગુજરાત ઇન્ટર કોર્પોરેશન ટી-૨૦ ડે-નાઇટ ટુર્નામેન્ટ’ અંતર્ગત થયેલ રૂ. ૨,૮૩,૨૦૦/- નું ચૂકવણું અભય ડેકોરેટર્સને કરવા તેમજ તે મુજબની રકમનો ગ્રાન્ટમાં વધારો કરવાની સ્થાયી સમિતિની દરખાસ્તને સર્વાનુમતે મંજૂર કરાઈ છે.

મહાનગરપાલિકા દ્વારા લેવાયેલા આ તમામ નિર્ણયો આગામી સમયમાં પાટનગરના નાગરિકોની સુખાકારી, ઇન્ફ્રાસ્ટ્રક્ચરની મજબૂતી અને વહીવટી સરળતા વધારવામાં આશીર્વાદરૂપ સાબિત થશે તેમ જણાવાયું છે.