EDની કડક કાર્યવાહીમાં ₹129 કરોડની સંપત્તિ જપ્ત

અમદાવાદમાં સામાન્ય માણસો અને રોકાણકારોને સસ્તા ઘર તથા ઊંચા વળતરની લાલચ આપીને કરોડો રૂપિયા ખંખેરી લેવાના કેસમાં એન્ફોર્સમેન્ટ ડિરેક્ટોરેટ (ED) દ્વારા સપાટો બોલાવવામાં આવ્યો છે.

કાર્યવાહીની મુખ્ય વિગતો

• જપ્ત કરાયેલી મિલકત: ₹129.80 કરોડની સ્થાવર મિલકતો કામચલાઉ ધોરણે ટાંચમાં (Attach) લેવાઈ છે.
• મુખ્ય આરોપીઓ: રોનક રવજીભાઈ સોનાની, વિપુલભાઈ ગોરધનભાઈ ગંગાણી અને મેસર્સ કેશવ નારાયણ ગ્રૂપ.
• તપાસનો આધાર: અમદાવાદના DCB ક્રાઈમ, બોપલ, સેટેલાઇટ અને નવરંગપુરા પોલીસ સ્ટેશનમાં નોંધાયેલી કુલ 5 FIR. મની લોન્ડરિંગ (PMLA) અને BNS હેઠળ ચાર્જશીટ પણ દાખલ થઈ ચૂકી છે.

કઈ રીતે આચરાયું કૌભાંડ?

આરોપીઓએ એક સુનિયોજિત મોડસ ઓપરેન્ડી હેઠળ મધ્યમવર્ગીય પરિવારોને ટાર્ગેટ કર્યા હતા:

• લોભામણી જાહેરાતો: ‘પ્રી-લોન્ચ’ ઓફરના નામે સસ્તા ફ્લેટ અને દુકાનો આપવાની લાલચ આપી.
• ખોટા વચનો: રોકાણકારોને 54% થી લઈને 100% સુધીના ફિક્સ્ડ રિટર્નની ગેરંટી આપી.
• ગેરકાયદેસર પ્રોજેક્ટ: આ તમામ માર્કેટિંગ RERA રજિસ્ટ્રેશન અને N.A. (બિન-ખેતી) મંજૂરી મેળવ્યા વિના જ કરવામાં આવ્યું હતું.

આ સ્કીમ્સમાં રોકાણકારો ફસાયા

• ‘છારોડી’ સ્કીમ: આ પ્રોજેક્ટમાં અંદાજે 250 થી વધુ ખરીદદારોના નાણાં સલવાયા.
• ‘અક્ષર અનંત’ સ્કીમ (શેલા): આ પ્રોજેક્ટમાં 44 થી વધુ લોકો સાથે છેતરપિંડી થઈ.
• આ તમામ ગ્રાહકોને ન તો પ્રોપર્ટીનો કબજો મળ્યો કે ન તો તેમના નાણાં પરત કરવામાં આવ્યા.

જમીનો પચાવી પાડવાનું ષડયંત્ર

ખોટા વાયદાઓ કરીને લોકો પાસેથી એકત્ર કરેલા ભંડોળને છુપાવવા માટે આરોપીઓએ ડમી દસ્તાવેજોનો સહારો લીધો હતો.

• છારોડી પ્રોજેક્ટ: RERA અને N.A. ની પ્રક્રિયા ચાલુ હોવાના બહાના હેઠળ આ જમીન કેવલ મહેન્દ્રભાઈ પટેલ, આશિષ વિષ્ણુભાઈ પટેલ અને અન્યોના નામે ટ્રાન્સફર કરી દીધી.
• અક્ષર અનંત પ્રોજેક્ટ: માત્ર MoU દર્શાવીને પ્રોજેક્ટ બંધ કરી દીધો અને જમીન પુરવ રમેશચંદ્ર પટેલ, દીપરાજવીરસિંહ ઝાલા અને મહેન્દ્રસિંહ ચુડાસમાના નામે ફેરવી નાખી.
• બનાવટી દસ્તાવેજો: આ તમામ વ્યવહારોમાં કોઈ વાસ્તવિક ચૂકવણી થઈ ન હતી, માત્ર કાલ્પનિક વિગતો દર્શાવીને ડમી સેલ ડીડ (Dummy Sale Deeds) ઊભા કરવામાં આવ્યા હતા.