ગાંધીનગરમાં સરકારી કામોમાં કરોડોનો ભ્રષ્ટાચાર, માનીતી એજન્સીઓને ૨૦૦ કરોડની લહાણી!

ગાંધીનગર:
ગુજરાતના પાટનગર ગાંધીનગરમાં સરકારી કામોની ફાળવણી અને ટેન્ડર પ્રક્રિયામાં મસમોટા કૌભાંડનો પર્દાફાશ થયો છે. સરકારી બાબુઓ અને કોન્ટ્રાક્ટરોની મિલીભગતથી માનીતી એજન્સીઓને કરોડો રૂપિયાના કામો પધરાવી દેવાયા છે, જ્યારે પ્રામાણિક કોન્ટ્રાક્ટરોના દિવાળીના (વર્ષ ૨૦૨૫ અને ૨૦૨૬) પેમેન્ટ ગ્રાન્ટ હોવા છતાં લટકાવી દેવામાં આવ્યા છે. ગાંધીનગર ગર્વમેન્ટ કોન્ટ્રાકટર એસોસીએશનની વારંવારની લેખિત રજૂઆતો છતાં તંત્ર ભેદી મૌન સેવી રહ્યું છે.

માનીતી એજન્સીઓ માટે ટેન્ડરના નિયમોમાં રાતોરાત ફેરફાર

નવા સચિવાલય (સરદાર ભવન) ખાતે બ્લોક ૧ થી ૧૪ ના મજબુતીકરણના રૂ. ૨૦૦ કરોડના ટેન્ડરોમાં મોટો ભ્રષ્ટાચાર આચરવામાં આવ્યો છે. પોતાની મનપસંદ ‘આકૃતિ કન્સ્ટ્રક્શન’ અને ‘સૌમ્ય કન્સ્ટ્રક્શન’ ને કામ આપવા માટે અનુભવના નિયમોમાં મનસ્વી ફેરફાર કરાયા છે. બ્રિજના કામના અનુભવને બદલે માત્ર ‘G+2 બિલ્ડિંગ’નો ક્રાઈટેરિયા ઉમેરીને ૧૫% ઊંચા ભાવે કામો આપી દેવાતા સરકારને આશરે ૧૫ કરોડનું નુકસાન જવાની ભીતિ છે.
એક કિસ્સામાં તો સ્પર્ધા ઘટાડવા માટે માત્ર ૨ જ દિવસમાં કોરીઝોન્ડમ બહાર પાડીને ટેન્ડરની સમયમર્યાદા ૧૧ માસથી ઘટાડીને ૩ માસ કરી દેવાઈ, અને ટર્નઓવર રૂ. ૫૪૩.૧૫ લાખથી વધારીને સીધું રૂ. ૧૯૯૧.૫૬ લાખ કરી દેવામાં આવ્યું. આશ્ચર્યની વાત એ છે કે, એજન્સી નક્કી થયા બાદ કામ પૂરું કરવા માટે મૂળ સમય કરતાં ૩ થી ૪ ગણો વધુ સમય આપવામાં આવે છે.

‘ગ્રીન સિટી’ બન્યું ‘કોંક્રિટ સિટી’: ટાઉન પ્લાનિંગની મંજૂરી વિના કમ્પાઉન્ડ વોલનું કૌભાંડ

હરિયાળા શહેર ગાંધીનગરમાં ટાઉન પ્લાનિંગ (TP) ની કોઈપણ મંજૂરી વિના ઠેર-ઠેર કમ્પાઉન્ડ વોલ (દીવાલો) ચણી દેવામાં આવી છે. આ આયોજનવિહોણા બાંધકામ પાછળ પણ કરોડોનું કૌભાંડ આચરવામાં આવ્યું છે. આ દીવાલોની આડમાં હવે અસામાજિક તત્વોને ગેરકાયદે પ્રવૃત્તિઓ માટે સુરક્ષિત અડ્ડો મળી ગયો છે, જે શહેરની કાયદો અને વ્યવસ્થા માટે મોટો ખતરો છે.

વગર ટેન્ડરે કામો અને કામ પૂર્ણ થયા પછી મંજૂરીઓ

ઓક્ટોબર ૨૦૨૫ થી ઓક્ટોબર ૨૦૨૬ સુધીના સમયગાળામાં પાટનગર યોજના વર્તુળ ખાતે જાહેર નિવિદા (ટેન્ડર) બહાર પાડ્યા વિના જ માનીતા કોન્ટ્રાક્ટરોને સીધા જ ભાવોભાવ કામ આપી દેવાયા છે. એટલું જ નહીં, વર્ષ ૨૦૨૬ ની શરૂઆતમાં અધિક્ષક ઈજનેર દ્વારા ૫૦ લાખ સુધીના કામો પૂરા થઈ ગયા પછી તેની વહીવટી મંજૂરીઓ આપી બજેટ હેડ બનાવીને ચૂકવણા કરવામાં આવ્યા છે, જે વહીવટી તંત્રની ગંભીર બેદરકારી અને ભ્રષ્ટાચારની ચાડી ખાય છે.

લેખિત રજૂઆત છતાં તંત્રનું ભેદી મૌન

ગાંધીનગર ગર્વમેન્ટ કોન્ટ્રાકટર એસોસીએશન દ્વારા ૨૧ ઓગસ્ટ ૨૦૨૬ ના રોજ અધિક્ષક ઈજનેરને ૧૧ ટેન્ડરોમાં થયેલી ગેરરીતિ અંગે પુરાવા સાથે લેખિત રજૂઆત કરી હતી. આ અગાઉ ૨૭ નવેમ્બર ૨૦૨૫ ના રોજ ઉમંગ પંચાલ દ્વારા ખુદ મુખ્યમંત્રીશ્રીને પણ મીલીભગતની ફરિયાદ કરાઈ હતી. છતાં, ભ્રષ્ટ અધિકારીઓએ “તંદુરસ્ત હરીફાઈ હોવાનું” જણાવી ગોળગોળ જવાબો આપીને ઉચ્ચ સ્તરે ગેરમાર્ગે દોર્યા છે અને આજદિન સુધી કોઈ નક્કર તપાસ થઈ નથી.
સરકારી તિજોરીને કરોડોનો ચૂનો ચોપડનાર આ કૌભાંડમાં કયા મોટા માથાઓનો હાથ છે તેની સત્વરે તટસ્થ અને ઉચ્ચ સ્તરીય તપાસ થાય તેવી સ્થાનિક કોન્ટ્રાક્ટરો અને જાગૃત નાગરિકોમાં ઉગ્ર માંગ ઉઠી છે. આવનારા સમયમાં જોવાનું એ રહેશે કે સરકાર આ મામલે કડક કાર્યવાહી કરે છે કે પછી ભ્રષ્ટાચાર પર પડદો પાડી દેવામાં આવે છે.

ગાંધીનગરમાં કથિત ટેન્ડર કૌભાંડ: માનીતી એજન્સીઓને લાભ અને બાકી નાણાં મુદ્દે કોન્ટ્રાક્ટર એસોસિએશન વિફર્યું, ઉગ્ર લડતની ચીમકી

ગાંધીનગર ગવર્મેન્ટ કોન્ટ્રાક્ટર એસોસિએશન દ્વારા સરકારી કામકાજોમાં થતી કથિત ગેરરીતિઓ અને લાંબા સમયથી અટવાયેલા નાણાંના મુદ્દે સંબંધિત અધિકારી એસ.બી. પુરોહિત સામે ગંભીર આક્ષેપો સાથે મોરચો માંડવામાં આવ્યો છે. એસોસિએશને આક્ષેપ કર્યો છે કે ટેન્ડર પ્રક્રિયામાં મનસ્વી રીતે ફેરફારો કરી માત્ર માનીતી એજન્સીઓને જ લાભ પહોંચાડાઈ રહ્યો છે અને કોન્ટ્રાક્ટરોના હકના નાણાં ચૂકવવામાં જાણીજોઈને વિલંબ કરવામાં આવી રહ્યો છે.

પ્રાપ્ત માહિતી અનુસાર, કોન્ટ્રાક્ટરોના બાકી નાણાં અંગે એસોસિએશન દ્વારા ગત વર્ષે ૨૦૨૫ ની દિવાળી પર પણ લેખિત રજૂઆત કરવામાં આવી હતી. હવે ૨૦૨૬ ની દિવાળીનો તહેવાર પણ આવી ગયો હોવા છતાં, એસ.બી. પુરોહિત દ્વારા આજદિન સુધી કોન્ટ્રાક્ટરોના હકના નાણાં ચૂકવવામાં આવ્યા નથી. સતત થઈ રહેલા આ અન્યાયને કારણે કોન્ટ્રાક્ટરોમાં ભારે રોષ વ્યાપી ગયો છે.

આર્થિક નુકસાન ઉપરાંત એવો પણ સનસનીખેજ આક્ષેપ કરવામાં આવ્યો છે કે કામના સ્પેસિફિકેશન્સ (નિયમો અને માપદંડો) માં ગેરકાયદેસર રીતે ફેરફાર કરીને માત્ર અમુક માનીતી એજન્સીઓ અને મળતિયાઓને જ કોન્ટ્રાક્ટ પધરાવવામાં આવી રહ્યા છે. એસોસિએશનનું કહેવું છે કે આ પ્રકારના કથિત કૌભાંડ અને ગેરરીતિથી સરકારી તિજોરીને સીધું અને વ્યાપક નુકસાન પહોંચાડવામાં આવી રહ્યું છે.

આશ્ચર્યની વાત એ છે કે, આ ગેરરીતિઓ અને કૌભાંડ અંગે વારંવાર લેખિત ફરિયાદો અને રજૂઆતો કરવા છતાં, એસ.બી. પુરોહિત કે અન્ય કોઈ ઉચ્ચ સત્તાધીશો દ્વારા આજદિન સુધી કોઈ જ તપાસ કે કાયદેસરની કાર્યવાહી કરવામાં આવી નથી. તંત્રની આ ઢીલી નીતિ સવાલો ઊભા કરી રહી છે.

એક સપ્તાહનું અલ્ટિમેટમ: તંત્રની સંપૂર્ણ નિષ્ક્રિયતા અને પારદર્શિતાના અભાવથી કંટાળીને ગાંધીનગર ગવર્મેન્ટ કોન્ટ્રાક્ટર એસોસિએશને હવે સ્પષ્ટ ચીમકી ઉચ્ચારી છે. એસોસિએશને માંગ કરી છે કે, જો આગામી એક અઠવાડિયામાં આ સમગ્ર કૌભાંડ અને બાકી નાણાંના મુદ્દે નિષ્પક્ષ અને યોગ્ય તપાસ કરવામાં નહીં આવે, તો આગામી સમયમાં ઉગ્ર લડત માટેની રણનીતિ ઘડવામાં આવશે. મળતિયાઓને અપાતા લાભ અને સામાન્ય કોન્ટ્રાક્ટરોને થતા અન્યાય સામે હવે આરપારની લડાઈના મંડાણ થવાની પૂરી શક્યતા છે.