ભવ્ય રજત જયંતી મહોત્સવ અને પુનઃ પ્રાણ પ્રતિષ્ઠા મહોત્સવની ઉજવણી કરાશે
શેરથા ગામની અધિષ્ઠાત્રી અને હજારો ભક્તોની આરાધ્ય દેવી શ્રી વારાહી માતાજીના મંદિરની પુનઃ પ્રાણ પ્રતિષ્ઠાના ૨૫ વર્ષ પૂર્ણ થવાના અવસરે આગામી તા. ૨૭ અને ૨૮ ઓક્ટોબર ૨૦૨૬ દરમિયાન ‘શ્રી વારાહી તીર્થક્ષેત્ર, શેરથા’ ખાતે ભવ્ય રજત જયંતી મહોત્સવનું આયોજન કરવામાં આવ્યું છે. આ પવિત્ર અવસરને લઈને સમગ્ર ગામમાં અને ધર્મપ્રેમીઓમાં અદ્ભુત ઉત્સાહ અને આનંદનો માહોલ છવાયો છે.આ ૨૫ વર્ષની ભક્તિમય યાત્રા ગ્રામજનોની એકતા, વડીલોના સંસ્કાર અને માતાજી પ્રત્યેની અખંડ આસ્થાનો અમૂલ્ય વારસો છે.
આ ઐતિહાસિક મહોત્સવ દેશ-વિદેશમાં વસતા શેરથા ગામના તમામ પરિવારજનોને માતાજીના પાવન સાંનિધ્યમાં એકત્રિત કરી આપણી સંસ્કૃતિને વધુ ઉજાગર કરશે.બે દિવસીય મહોત્સવના વિવિધ ધાર્મિક કાર્યક્રમોની રૂપરેખા પ્રમાણે પ્રથમ દિવસે તારીખ ૨૭-૧૦-૨૦૨૬ ને મંગળવારે સવારે ૧૦:૧૫ કલાકે યજમાનોની પવિત્ર પૂજન વિધિથી પ્રારંભ થશે. ત્યારબાદ સવારે ૧૧:૩૦ કલાકે ભોજન સમારંભ યોજાશે. બપોરે ૧:૧૫ કલાકે લાઈવ ડી.જે.ના સૂર સાથે ગામમાં ભવ્ય નગરયાત્રા (શોભાયાત્રા) નીકળશે. સાંજે ૬:૦૦ કલાકે ભવ્ય આરતી અને ૬:૩૦ કલાકે ભોજન સમારંભ યોજાશે. જ્યારે રાત્રે ૮:૩૦ કલાકે લોકપ્રિય કલાકાર સાગરભાઈ પટેલના હસ્તે રંગારંગ રાસ-ગરબા કાર્યક્રમનું આકર્ષણ રહેશે.બીજા દિવસે તારીખ ૨૮-૧૦-૨૦૨૬ ને બુધવારે સવારે ૬:૧૫ કલાકે આચાર્યશ્રી ત્રિવેદી વિજયભાઈ મનસુખલાલના માર્ગદર્શન હેઠળ મહાયજ્ઞનો પ્રારંભ થશે. સવારે ૧૧:૩૦ કલાકે ભોજન પ્રસાદ યોજાશે. સાંજે ૪:૩૦ કલાકે શ્રીફળ હોમ સાથે યજ્ઞની પૂર્ણાહુતિ થશે. ત્યારબાદ સાંજે ૫:૦૦ કલાકે ભવ્ય મહાઆરતી અને સાંજે ૬:૩૦ કલાકે મહાપ્રસાદનું આયોજન કરવામાં આવ્યું છે.
શ્રી વારાહી તીર્થક્ષેત્ર ટ્રસ્ટ, શ્રી નરસિંહજી મંદિર ટ્રસ્ટ અને શ્રી શક્તિ અંબાજી માતા મંડળ, શેરથા દ્વારા તમામ ધર્મપ્રેમી જનતાને આ ધાર્મિક ઉત્સવમાં સહપરિવાર પધારી માતાજીના દર્શન-પૂજનનો લાભ લેવા અને પાવન અવસરની શોભા વધારવા હૃદયપૂર્વક ભાવભીનું આમંત્રણ પાઠવવામાં આવ્યું છે.
